Łužica – stejnišćo ze swójskim profilom
Moderna, wukonliwa a do přichoda wusměrjena - takle hodźi so Łužica jako hospodarski region charakterizować.
Tule, před wrotami do wuchoda a w třiróžku třoch krajow – je wšelake rjemjesło a industrija hižo dołho doma. Branšam škleńčerstwa, tekstilneje a drastoweje industrije, mašinotwarej a wobdźěłanju metala, železniskej technice, chemiskej industriji a předźěłanju kumštnych maćiznow kaž tež produkciji žiwidłow přidružachu so pospochi dalše hałžki, kaž energijowa a wobswětowa technika abo wšelakore jadrowe wobłuki hospodarskeho wuwića.
Do lěpšinow tuteje kónčiny w tutym zwisku słuša, zo su jednotliwe branše do wulkeje měry splećene a zo je tu derje wuwita infrastruktura, kotraž skića zwisk k hospodarskim centram Drježdźany/Lipsk a Berlin w Němskej, do Wrocławja w Pólskej a do Mladeje Boleslavy a Prahi w Čěskej. Na awtodróhach A A 13, A 4 a A 15 hodźa so najwažniše europske hospodarske stejnišća spěšnje docpěć. Lětanišća w Berlinje, Lipsku a Drježdźanach kaž tež zwiski Němskeje železnicy infrastrukturu wudospołnjeja. Region je dźakowano swojej wobstajnej kooperaciji z hospodarstwom, wědomosću a zarjadnistwom susodneju krajow Pólskeje a Čěskeje idealne wuchadźišćo na wiki do srjedźneje a wuchodneje Europy.
Inwestowanje do tuteje hospodarskeje kónčiny woznamjenja inwestowanje do přichoda.
Łužicu jako hospodarski region postajeja tradicionalne kaž tež inowatiwne branže, kaž energijowa a wobswětowa technika, chemiska industrija, předźěłanje kumštnych maćiznow, žiwidłowa a požiwadłowa industrija, mašinotwar a wobdźěłanje metala. Wukonliwe dodawarske předewzaća, na přikład za awtomobilnu industriju a twar jězdźidłow kaž tež mjezynarodnje agěrowace předewzaća, kaž na přikład Bombardier Transportation Germany, Magna-International, Siemens Power Generation a BASF, maja we Łužicy swoje produkciske zawody. Nimo toho wuznam turizma a wólnočasneho hospodarstwa stajnje přiběra. Nimo prózdninskich kónčinow, kotrež su po wšej Němskej a zwonka njeje znate – kaž Žitawske horiny abo Błóta -, skićeja nowe poskitki hosćom a wopytowarjam šěrše móžnosće k přežiwjenju swojeho dowola a wočerstwjenju. Tak nastawa we wutrobje Łužicy, hdźež wudobywachu bagry něhdy brunicu ze zemje, tuchwilu najwjetša wot čłowjeka stworjena jězorina Europy a štwórta najwjetša jězorina Němskeje: Łužiska jězorina.
Hospodarske wuwiće regiona garantuja mnohe moderne a stabilne předewzaća w derje so wuwiwacych branšach, kiž produkuja kwalitne produkty – hač za wozydłowu techniku, za industriju konsumowych tworow abo elektroindustriju. K tomu słušeja tež dalše znate marki „Made in Łužica“, kaž edding, Falken Office Products, Fit, Rei a Sanso, Möve frottana, Łužiska škleńca, Müllermilch, Südzucker, Campina a Błótowske kórki.
Łužiske předewzaća su derje organizowane a su so na wubědźowanje w tukraju a mjezynarodnje nastajili – tež z tworjenjom syćow mjez předewzaćemi a w předewzaćelskich zwjazkach.
Klučowe branše we Łužicy
Energijowa a wobswětowa technika – tu nastawa milina
Třeći najwjetši energijowy předewzaćel Němskeje, Vattenfall Europe AG, skutkuje tež we Łužicy a přinošuje z po wšěm swěće najmodernšimi milinarnjemi na zakładźe brunicy a z prěnjej pilotowej milinarnju w Čornej Pumpje, kotraž bjez wuhlikoweho dioksida produkuje, wuznamnje k tomu, zo so Łužica jako stejnišćo energijoweho hospodarstwa wuwiwa a profiluje. Produkcija wobnowjomnych energijow bywa dale a wažniša a slědźerske institucije regiona tute wšelake procesy přewodźeja.
Mašinotwar a wobdźěłanje metala – wšitko z jednoho regiona
Tójšto łužiskich předewzaćow dźěła we wobłuku twara specialnych mašinow a gratotwara kaž tež twara připrawow a metalotwara. Tule produkuja so kolijate jězdźidła, ratarske mašiny a systemy za twar awtow. Paleta produktow saha wot twarskich elementow a komponentow za nutřkowne wuhotowanje jězdźidłow přez kompresory za klimowe připrawy awtow hač k serijowym dźělam za kolesyny. Železniska technika w Budyšinje, Zhorjelcu a Niskej je europski kompetencny centrum za najmoderniše tramwajki a měšćanske železnicy, dwuposchodowe wozy kaž tež specialne železniske wozy za transport tworow. Tutu kompetencu wudospołnjeja zawod za wudźeržowanje železnicow kaž tež mnohe dodawarske a posłužbowe zawody w cyłym regionje.
Chemiska industrija a technika kumštnych maćiznow – molekule zwjazuja
Chemiska industrija a technika kumštnych maćiznow stej tradicionalnej hałžce hospodarstwa Łužicy. Najwažnišej stej chemiskej stejnišći Schwarzheide a Gubin z tam zasydlenymaj chemiskimaj koncernomaj BASF a Trevira. Łužiska technika kumštnych maćiznow z firmami kaž Plastic Concept, INTIER, Schicktanz, Haase GfK Technik, Lausitz Elaste a produkcija rotorskich łopjenow firmy Vestas su so mjez druhim jako dodawarjo mjezynarodnej awtomobilnej branši, domjacnostnej industriji a elektronice kaž tež jako poskićowarjo systemowych rozrisanjow profilowali.
Tekstilna industrija – tule nitki hromadu běža
Łužica je jedna z najstaršich a zdobom najmodernišich tekstilnych regionow Europy. Mnohostronskosć regionalneje tekstilneje industrije je wusahowaca. W tekstilnych předewzaćach nastawaja mjez druhim drasta, tekstilije za domjacnosć a techniske tekstilije. Wosrjedź tekstilneho eurorgiona, do kotrehož słušeja tradicionalne centry tekstilneje a drastoweje industrije w Braniborskej, Sakskej kaž tež w Pólskej a Čěskej, je so dołholětna tradicija tekstilneje industrije jako jedna z najwažnišich hospodarskich branšow Łužicy wuwiła.
Produkcija žiwidłow a požiwadłow – Łužicu woptawać
Žiwidła a požiwadła so w mnohich tradicionalnych rjemjeslniskich zawodach a modernych industrijnych předewzaćach produkuja, kotrež su daloko přez mjezy regiona znate. Do tradicionalnych produktow słušeja poprjancy z Połčnicy, Łužiski karp, chrěn a lany wolij. Tójšto produktow, kaž Budyski žonop, produkty Kunella, Wjelećanski bruny, šokolady firmy Felicitas, cwibak z Wjazońcy, mineralka z Bad Liebenwerdy a z Wopakskich mineralnych žórłow, Łužiske brěčki a wšelakore piwowarske produkty su po wšej Němskej na předań a so do wukraja dodawaja.
Škleńčerstwo – industrijna hałžka z dołhej tradiciju
Škleńčerstwo dlěje hač lětstotk hospodarske wuwiće sobu postajowaše. W dwacetych a třicetych lětach 20. lětstotka dominowaše Łužiske škleńčerstwo po wšěm swěće. Hač do 1990 postajowaše ze swojimi produktami, kaž hospodarskej, wołojowej škleńcu a škleńcu za lampy, wiki w NDR. Dźensa organizuja so nimale wšitke na wikach zastupjene předewzaća škleńčerskeje branše kaž tež předewzaća dodawarskeje a posłužboweje branše w Kole łužiskeje škleńcy z.t.
Turistiske hospodarstwo – hospodliwosć z wulkej kwalitu
Łužica skića Wam za dowol (nimale) wšitke móžnosće: Wočerstwjejće so aktiwnje při kolesowanju (w jednej z najatraktiwnišich kolesowanskich kónčin Němskeje), pućujo, krosnujo, skatujo a wužiwajo wšelakore poskitki wódneho sporta. Kulturu a architekturu dožiwiće w historiskich městach a idyliskich wsach. Wobhladajće sej žiwe nałožki a tradicije Serbow w Hornjej, srjedźnej a Delnjej Łužicy kaž tež tradiciju rjemjesła a rybarstwa. Dajće sej krasne parki wjercha Pücklera a fascinowacu zahrodkacu kulturu kaž tež swědki łužiskeje industrijneje kultury lubić a so z wosebitej hospodliwosću w najwuchodnišej prózdninskej kónčinje Němskeje zapleńčić.
Nowotarske technologije a wusměrjenosć do přichoda
Łužica njeje jenož w tradicionalnych branšach wuspěšna. Do přichoda wusměrjene, nowotarske produkty a technologije, kotrež so we Łužicy kaž tež w cyłym swěće produkuja, so tu wuwiwaja. Kooperaciske partnery su při tym Braniborska Techniska uniwersita Choćebuz, Mjezynarodny wysokošulski institut Žitawa-Zhorjelc, Techniska wysoka šula Wildau, Fachowa wysoka šula za financy Königs Wusterhausen, Wysoka šula Sakskeje policije (FH) Rózbork, Statna studijna akademija (BA) Budyšin a wšelake slědźenske instituty.
Wšelake kooperaciske syće su so wuwili, w kotrychž inowatiwne předewzaća regiona kompetentnych partnerow namakaja,
- zo bychu so regionalne kooperacije mjez předewzaćemi natwarili (za rozšěrjenje a wobstaranje produktow a za serwis)
- zo bychu so nowotarske produkty wuwiwali
- zo bychu so strategije za wuwiće personala nadźěłali
- zo by so wobstatk dale wuwiwał
- zo byštej so nutřkowny a wonkowny marketing zwoprawdźiłoj
- zo by so euroregionalne zhromadne dźěło zeskutkownjało.
Za nowe předewzaća, kotrež so w regionje załoža abo zasydla, su tu jara dobre wuměnjenja a regionalni akterojo z wobłuka hospodarstwa, wědomosće a zarjadnistwa podpěruja a spěchuja inowacije. We wšitkich wažnych branšach eksistuja aktiwne syće, kotrež tež nowych partnerow zapřijeja a podpěruja.
Regionalni narěčni partnerojo
| Marketingowa towaršnosć Hornja Łužica-Delnja Šleska zwr jednaćel dr. Holm Große Tzschirnerowa 14a 02625 Budyšin telefon: +49 (3591) 48770 telefax: +49 (3591) 487748 e-majl: info@oberlausitz.com |
Regionalny management regiona Łužica-Błóta regionalna managerka dr. Christina Eisenberg Gubinska 24 03046 Choćebuz telefon: +49 (355) 28890404 telefax: +49 (355) 28890405 e-majl: info@lausitz.de |
Naju zhromadny wustup w interneće:
www.lausitz.de